Markaz rahbariyati

RIPIATM pediatriya ilmiy-amaliy tibbiyot markazi boshqaruvi aʼzolari bilan tanishing.

Direktor

Abduqayumov Abdumannop Abdumadjitovich

Tibbiyot fanlari doktori

O‘zbekiston otolaringologlar assotsiatsiyasi, Butunjahon otolaringologlar konferensiyasi (IFOS) va Yevropa plastik va rekonstruktiv jarrohlar assotsiatsiyasi (IPRAS) aʼzosi.

Birinchi Toshkent Davlat Tibbiyot institutini tugatgach, 2001–2004-yillarda «Otorinolaringologiya» yo‘nalishida magistraturada tahsil olgan. Abduqayumov A.A. vrach-otolaringolog bo‘lib, 2009-yilda nomzodlik, 2016-yilda doktorlik dissertatsiyasini himoya qilgan va 40 dan ortiq ilmiy maqola muallifidir.

U Toshkent tibbiyot akademiyasining 3-klinikasi LOR bo‘limida, «Gatling-Med» va «Estimed» xususiy klinikalarida ishlagan. 2013-yildan Respublika ixtisoslashtirilgan pediatriya ilmiy-amaliy tibbiyot markazining tug‘ma va orttirilgan LOR kasalliklari bo‘limida shifokor-ordinator, 2014-yildan bosh shifokor bo‘lib faoliyat yuritgan. 2023-yilda markaz direktori lavozimiga tayinlangan.

2005-yilda O‘zbekiston Respublikasi Prezidenti huzuridagi Davlat boshqaruvi va qurilish akademiyasi qoshidagi «Rahbar» markazida tahsil olgan.

Direktor o‘rinbosari

Mirsalixova Nargis Xayrullayevna

Tibbiyot fanlari doktori

1994-yilda Toshkent pediatriya tibbiyot institutini tamomlagan.

Sog‘liqni saqlash vazirligining tegishli buyrug‘i bilan Mirsalixova Nargis Xayrullayevna Respublika ixtisoslashtirilgan pediatriya ilmiy-amaliy tibbiyot markazining ilmiy ishlar bo‘yicha direktor o‘rinbosari lavozimiga tayinlangan.

Turli yillarda Pediatriya ilmiy-tadqiqot instituti kichik ilmiy xodimi, markaz pulmonologiya bo‘limi katta ilmiy xodimi va Toshkent tibbiyot akademiyasi kafedrasi dotsenti sifatida faoliyat yuritgan. Ushbu lavozimga tayinlangunga qadar Tibbiyot xodimlarining kasbiy malakasini rivojlantirish markazi pediatriya kafedrasi mudiri bo‘lgan.

Bosh shifokor

Razakov Azamat Djurayevich

Tibbiyot fanlari nomzodi, oliy toifali shifokor

Markazning davolash ishlari bo‘yicha direktor o‘rinbosari, tibbiyot fanlari nomzodi, oliy toifali shifokor.

2002–2005-yillarda Termiz tibbiyot kollejining farmatsiya yo‘nalishini, 2006–2013-yillarda Toshkent tibbiyot akademiyasining «Davolash ishi» yo‘nalishini tamomlagan. 2013–2015-yillarda Ukrainadagi P.L. Shupik nomidagi oliy diplomdan keyingi akademiyada «Otorinolaringologiya» mutaxassisligi bo‘yicha tahsil olgan.

2015–2019-yillarda markazning tug‘ma va orttirilgan LOR kasalliklari bo‘limida navbatchi shifokor, 2019–2022-yillarda tayanch doktorant bo‘lib ishlagan. 2023-yilda PhD darajasini olgan. 2024-yilda poliklinika va qabul bo‘limi mudiri bo‘lgan, 2024-yil oxiridan markazning davolash ishlari bo‘yicha direktor o‘rinbosari lavozimiga tayinlangan.

Hududiy filiallar bilan ishlash masalalari bo‘yicha direktor o‘rinbosari

Sayfutdinov Zayniddin Asamutdinovich

Tibbiyot fanlari nomzodi

2006-yilda Toshkent tibbiyot akademiyasini tamomlagan. 2006–2008-yillarda klinik ordinaturada tahsil olgan.

Mehnat faoliyatini O‘zbekiston Respublikasi Mudofaa vazirligining markaziy sud-tibbiy va patologik anatomiya laboratoriyasida shifokor-ekspert sifatida boshlagan. Turli yillarda Respublika ixtisoslashtirilgan ftiziatriya va pulmonologiya ilmiy-amaliy tibbiyot markazi milliy referens laboratoriyasi mudiri, O‘zbekiston Respublikasi Prezidenti Administratsiyasi sog‘liqni saqlash masalalari sektori yetakchi konsultanti va Sog‘liqni saqlash vazirligi boshqarma boshlig‘i kabi masʼul lavozimlarda ishlagan.

Tayinlovga qadar Sog‘liqni saqlash vazirligi Tibbiy yordamni tashkil etish departamentining ixtisoslashtirilgan markazlar faoliyatini muvofiqlashtirish bo‘limi boshlig‘i bo‘lgan.

Ilmiy kotib

Musajanova Raʼno Anvarbekovna

Tibbiyot fanlari doktori

2024-yilda markazning ilmiy kotibasi lavozimiga tayinlangan.

1994-yilda Toshkent pediatriya tibbiyot institutini tamomlagan. Mehnat faoliyatini markaz klinikasining pulmonologiya bo‘limi shifokori sifatida boshlab, keyinchalik shu bo‘limda kichik ilmiy xodim, katta ilmiy xodim va loyiha rahbari sifatida faoliyat yuritgan.

Ushbu lavozimga tayinlangunga qadar Respublika ixtisoslashtirilgan pediatriya ilmiy-amaliy tibbiyot markazi pulmonologiya bo‘limining yetakchi ilmiy xodimi bo‘lgan.

Tibbiy turizm va xalqaro hamkorlikni rivojlantirish bo‘limi boshlig‘i

Geller Svetlana Igorovna

Tibbiyot fanlari nomzodi

Bo‘lim 2019-yil 9-yanvarda tashkil etilgan.

Bo‘limda bir necha tillarni biladigan tajribali va ijodkor xodimlar, jumladan Qosimova I.B. va Zaynobitdinov X.B. faoliyat yuritadi. Bo‘lim markazning xalqaro hamkorligi va xorijiy bemorlar bilan ishlash yo‘nalishlarini rivojlantirishga xizmat qiladi.